Iago Tabarés participa no inicio da campaña contra o espolio eólico da comarca de Celanova

CELANOVA
Iago Tabarés con militantes do BNG de Celanova

O BNG esixe que o alcalde de Celanova faga público o informe arqueolóxico do proxecto de polígono eólico no Monte da Neve

 

As nacionalistas denuncian que, malia o acordo plenario alcanzado por unanimidade en abril para que o Concello ofrecese información á veciñanza, o alcalde aínda non deu a coñecer sequera as súas propias alegacións contra o proxecto.

 

A cidadanía é consciente de que Galiza non pode ser simplemente un lugar onde se espolien recursos para engordar a conta de resultados das grandes compañías eléctricas”, resumiu o deputado Iago Tabarés.

 

As nacionalistas continuarán nas próximas semanas a campaña informativa iniciada hoxe por outras localidades da comarca.

Iago Tabarés participa no inicio da campaña contra o espolio eólico da comarca de Celanova

O deputado por Ourense, Iago Tabarés, e o portavoz do BNG Celanova, Leopoldo Rodríguez, participaron este sábado nunha mesa informativa con militancia do BNG en Celanova e trasladaron ás veciñas e veciños o sentir nacionalista a respecto da invasión de proxectos de instalacións eólicas que está a sufrir o país e, en particular, a súa preocupación polas afeccións concretas do proxecto no Monte da Neve, que, de levarse adiante, terá impactos severos para a paisaxe, o patrimonio cultural da vila e a saúde e mesmo as economías das poboacións máis próximas aos aeroxeneradores.

 

“Desde o BNG apostamos polas renovábeis, mais entendemos que este bum eólico que estamos a padecer non serve aos intereses do país. No ano 2019 instalouse na Galiza tanta potencia eólica como durante toda a década anterior, pero iso non significou termos unha tarifa eléctrica galega nin gozar de participación pública nos beneficios nin para fomentar o autoabastecemento”, dixo Iago Tabarés na praza Maior de Celanova esta mañá, xunto a dúas ducias de militantes nacionalistas entre os que se encontraban o responsábel comarcal, Manuel Ferro, e militancia de Galiza Nova.

 

“Vai sendo hora de que o Concello dea a información que ten sobre o proxecto. Entre outras cousas, porque así se acordou nun pleno hai cinco semanas. E temos que ser nós, o BNG, quen se presente na rúa dar esa información que o Concello non quere dar”, subliñou Leopoldo Rodríguez, quen insistiu nos elementos da oposición nacionalista á instalación dos sete aeroxeneradores e destacou entre eles que en Alemaña “a distancia legal entre os aeroxeneradores e as casas que para este tipo de instalacións é o dobre que a que temos aquí”, e que “ao redor da perimetral dos polígonos as fincas e as casas perden, segundo estudos noutros países, entre un 30 e un 50% de valor”.

 

Leopoldo Rodríguez insistiu no feito de que o alcalde teña impedido mediante unha resolución que se poida divulgar o informe municipal arqueolóxico, “despois de asegurar por dúas veces no pleno que ese informe di "practicamente" o mesmo que o informe da empresa, e cando puidemos comprobar que di moitas cousas máis. A xente ten dereito de coñecelo xa”.

 

“A cidadanía é consciente de que Galiza non pode ser simplemente un lugar onde se espolien recursos para engordar a conta de resultados das grandes compañías eléctricas”, resumiu o deputado Iago Tabarés para encadrar a loita contra o polígono eólico en Celanova no amplo movemento veciñal de oposición que agromou por todo o país.

 

Durante hora e media, e malia a chuvia, representantes nacionalistas e militantes repartiron uns douscentos folletos con detalles sobre o plan da empresa alemá que promove o polígono no Monte da Neve e cos argumentos da resposta que está a dar o BNG a nivel galego. Nas próximas semanas, as nacionalistas teñen a intención de continuar con esta campaña informativa iniciada hoxe por toda a comarca.

Iago Tabarés participa no inicio da campaña contra o espolio eólico da comarca de Celanova