Ourense, 02 de abril de 2024. Xa en agosto de 2020, cando o Concello de Ourense asinou o contrato de concesión para a explotación da cafetería sita na rúa Curros Enríquez, ao carón do xardín Xaponés e cuxa denominación pasou a ser a de “La Pajarera”, o Grupo municipal do BNG amosaba as súas dúbidas sobre a idoneidade do adxudicatario e as condicións do propio contrato. Adxudicatario que actualmente está detido e sobre o que pesan acusacións xudiciais moi graves.

Tal e como lembra o Portavoz municipal Luís Seara, “xa daquelas había dúbidas sobre a idoneidade do adxudicatario que agora parecen verse corroboradas”. Seara engade, ”neste momento temos unha instalación propiedade do Concello, concesionada e cuxo contrato non se está a cumprir, tal e como se desprende dos informes técnicos aos que tivemos acceso e nos que se especifica unha cesión irrregular a terceiros sen ter a previa autorización municipal, tal e como establece o contrato, o que supón un incumprimento flagrante do mesmo sen que por parte do Goberno Local se activasen os mecanismos sancionadores correspondentes”. Seara engade, “moito nos tememos que dita cesión a un terceiro sexa validada pola Xunta de Goberno Local a feitos consumados, algo que consideramos gravísimo”.

Desde a formación nacionalista lembran que foi precisamente como consecuencia dunha cesión irregular a un terceiro, o motivo polo que o Concello rescatou a concesión no ano 2018, “logo de que Jácome puxera entón o grito no ceo e acusara a todo o mundo de ser cómplice daquela situación. Pois ben, agora atopámonos nunha igual e o Alcalde nin di, nin fai absolutamente nada por solucionala, ¿por qué?”.

Outra das irregulariedades denunciada polo Grupo municipal do BNG e polos técnicos responsables do contrato ten que ver co feito de que “tal e como queda acreditado a través das inspeccións realizadas, o local estivo pechado desde o 22 de agosto até o 5 de setembro de 2023 o que tería provocado, tal e como se recolle no informe e no contrato, a apertura dun expediente sancionador por unha infracción grave. Que nos saibamos, non se fixo”.

Toda esta situación revela, segundo o BNG “a nefasta xestión do actual Goberno local con Jácome á fronte, quen lonxe de cumprir con todo aquilo que pregoaba estando na

Oposición, está sumindo ao Concello nun caos organizativo e éconómico sen precedentes. Gobernando para os seus propios intereses e aos dos seus achegados e a costa dos cartos de todas e todos os veciños de Ourense”.

Orzamentos, buses e bombeiros.

Preguntado polos xornalistas presentes na rolda, o Portavoz municipal do BNG Luís Seara, abordou outras cuestións relativas á actualidade municipal. No tocante á posta en servizo da nova liña 6 de buses, destacou que “o problema xorde cando se toma unha decisión illada, sen ten en conta ao conxunto pois a afectación que esta decisión está a ter no resto das liñas provoca o aumento dos tempos dos traxectos e polo tanto diminúe as frecuencias”. Seara incide en que “as cousas fixéronse mal desde o primeiro momento, mercáronse novos autobuses, de dubidosa calidade, sen ter definido o novo mapa de liñas e iso provoca os desaxustes e os problemas actuais”.

No relativo á falla de Orzamentos actualizados, desde o BNG lembran que non soamente o Concello non conta cuns Orzamentos actualizados senón que “sobre os que están en vigor, os de 2020, pesa unha sentenza que anula o capítulo I”, e engade, “esta situación está a xerar múltiples complicacións nun Concello que de non actualizar os orzamentos pode ver perigar a nómina de decembro”. Os nacionalistas amosáronse dispostos a dialogar e negociar co Goberno Local pero lembran que “a iniciativa ten que partir deles, que presenten un borrador, sentámonos se nos chaman e falamos aínda que danos a impresión que o PP voltará sair ao rescate de Jácome”.

Cuestionado sobre o proceso selectivo aberto para a cobertura de 8 prazas de bombeiro en calidade de interinos e as posíbeis dúbidas sobre o procedemento de selección seguido, Seara amosouse cauteloso á hora de emitir unha valoración, “pediremos acceso ao expediente para ver os informes da Asesoría Xurídica e do director de RRHH antes de facer calquera valoración”. En todo caso, desde o BNG inciden en que “o que se pretende facer é pór un mero parche, os problemas no Parque de Bombeiros son estruturais e como tales requiren de solucións duradeiras e de maior calado. Cómpre levar a cabo un proceso selectivo que permita cubrir todas as necesidades de persoal que hai actualmente”.

Comedor sobre rodas.

No relativo á situación creada polo Goberno Local ao suprimir o programa comedor sobre rodas e “deixar sen comer a persoas altamente vulnerábeis ao tempo que a Concelleira delegada ía de vacacións”, a Concelleira Rhut Reza sinalou que “pediremos a súa dimisión”.