O BNG celebrou a primeira reunión do seu “obradoiro de ideas”

reunión do Obradoiro de ideas do BNG de Ourense
Reunión do Obradoiro de ideas do BNG de Ourense

Os obxectivos dos nacionalistas pasan non por elaborar un programa electoral senón por xerar creatividade, imaxinación e iniciativa para idear e definir o modelo de concello do futuro, para o cal valoran aprender do feito e das experiencias dos participantes

O BNG celebrou a primeira reunión do seu “obradoiro de ideas”

Ourense, 10 de outubro de 2022.  O BNG de Ourense celebrou a primeira reunión do seu “obradoiro de ideas”. Nela participaron persoas relacionadas coa propia administración mais tamén do mundo económico, cultural, social, do ámbito da mobilidade, do urbanismo e mesmo do deportivo.

A través da experiencia e dos coñecementos de todas as persoas participantes, no BNG márcanse como reto non elaborar un programa electoral senón reflexionar e avaliar a situación actual do Concello de Ourense desde todos os puntos de vista para a partires de aí deseñar proxectos e liñas de actuación a impulsar para tentar reverter a situación actual.

Durante a reunión o Portavoz municipal e candidato á alcaldía Luís Seara agradeceu o compromiso e a implicación de todas e todos os participantes ao tempo que avanzou que o obxectivo último é “ofrecerlle á veciñanza de Ourense unha alternativa seria e rigorosa e cun proxecto crible e baseado no coñecemento da situación actual, das necesidades urxentes do concello e nas propostas realistas e transformadoras que muden a situación e lle devolvan ás veciñas e veciños o orgullo de ser de Ourense”.

Pola súa banda a deputada Noa Presas, encargada de moderar a xuntanza, destacou a ampla experiencia persoal e profesional das persoas participantes con perfís diversos e que “desde unha perspectiva diferente á que se manexa habitualmente dentro das formacións políticas sen dúbida aportarán grandes ideas e iniciativas”.

De entre os perfís dos participantes destacan técnicos da administración local, ex alcaldes e conselleiros da Xunta, emprendedores, creadores culturais, expertos en urbanismo, en mobilidade e arquitectura, do mundo empresarial e económico así como do ámbito social, do terceiro sector e o deportivo.

Os traballos terán continuidade nas vindeiras semanas coa posta en común das propostas que vaian xurdindo dentro de cada unha das áreas de traballo establecidas.

Luís Seara durante un momento da reunión
Luís Seara durante un momento da reunión
O BNG celebrou a primeira reunión do seu “obradoiro de ideas”