O deputado do BNG na Deputación de Ourense, Xosé Manuel Puga, reclamou que se respecten os acordos acadados no seo do Comité Técnico-Político do transporte metropolitano celebrada hoxe pola maña e advertiu de que o Bloque "non aceptará volver ao punto de partida" despois de preto de dous anos de traballo entre a Deputación, o Concello de Ourense e os municipios da contorna.

Puga lembrou que o consenso alcanzado durante este tempo pasaba por aproveitar a nova concesión do transporte urbano da cidade para ampliar as liñas existentes cara aos concellos limítrofes, mentres a Xunta de Galiza asumía a reorganización das rutas interurbanas da súa competencia para integralas no novo sistema.

"Falamos dun modelo que permitiría que a veciñanza dos concellos da contorna puidese desprazarse con máis facilidade á cidade e que, ao mesmo tempo, as persoas residentes en Ourense puidesen acceder aos municipios limítrofes mediante un sistema coordinado e eficiente", explicou.

Porén, o deputado nacionalista amosou a súa preocupación porque tanto o Concello de Ourense como a Deputación estean agora defendendo modificar o modelo inicialmente acordado, argumentando que a extensión das liñas urbanas suporía un custo económico elevado.

Para o BNG, esta posición supón "desandar todo o camiño percorrido" e pon en risco a posta en marcha dun servizo estratéxico para o desenvolvemento da área metropolitana.

"Este non é un problema de cartos. Por moito que falásemos dun millón, de dous ou de tres millóns de euros, non hai escusa para renunciar a un transporte metropolitano que xeraría importantes beneficios económicos, sociais e ambientais", afirmou Puga.

O deputado incidiu en que a implantación deste modelo favorecería a actividade comercial e económica de toda a contorna de Ourense, contribuiría á fixación de poboación nos concellos do rural ao facilitar os desprazamentos diarios e permitiría reducir o número de vehículos privados que acceden á cidade, mellorando tamén a mobilidade e reducindo as emisións contaminantes.

"O transporte metropolitano non pode analizarse unicamente desde unha perspectiva contable. Ten unha clara rendibilidade social, económica e ecolóxica que xustifica plenamente o investimento necesario", sinalou.

Por todo iso, o BNG reiterou a necesidade de executar os acordos alcanzados durante estes dous anos de traballo, mantendo a extensión das oito liñas do transporte urbano de Ourense cara aos concellos limítrofes e coordinándoas coas rutas concesionadas pola Xunta de Galiza.

"Non ten ningún sentido volver comezar desde cero despois de dous anos de negociacións e consensos. A cidadanía non entendería que todo o traballo realizado acabase nun caixón por unha cuestión exclusivamente económica", concluíu Xosé Manuel Puga.