Ourense, 21 de abril de 2026. Nas Xuntas de Área celebradas esta mañá no Concello de Ourense, o Grupo municipal do BNG instou ao Goberno local a contratar máis traballadoras sociais, tanto para atender os expedientes asociados ao Servizo de dependencia como para atender o proceso de regularización, pois leva asociado un informe de vulnerabilidade que ten que ser emitido polos Servizos municipais. A Concelleira Rhut Reza denuncia que a día de hoxe “danse citas para ese informe con data 30 de xuño”.

Reza insiste en que “antes había sete traballadoras sociais no departamento e agora só hai tres. Hai unha baixa sen cubrir desde hai dous meses, o que orixina que a día de hoxe haxa un atraso de mes e medio para a primeira cita”.

O Goberno local esgrime “que xa non quedan prazas vacantes”, argumento que segundo Rhut Reza, “secunda o PP pois na propia Xunta de Área deixaron claro que non son partidarios de aumentar o persoal”. Reza defende que “desde o BNG temos claro que existe unha necesidade real pois é preciso darlle saída aos expedientes pendentes tanto no Servizo de dependencia como nos referidos aos informes de vulnerabilidade do proceso de regularización polo que está máis que xustificada a contratación de máis persoal”.

Obras na Avda. de Portugal.

Na Xunta de Área de Urbanismo e Infraestruturas e a preguntas formuladas polo BNG, o Concelleiro delegado confirmou que os traballos a realizar pola empresa Misturas a través dun contrato de emerxencia, centraranse en garantir a seguridade e salubridade da zona e que cando estes rematen, avaliarase a obra feita para recalcular o custe do que queda por facer e sacar a licitación un novo proxecto para poder, deste xeito, rematar coa humanización completa da rúa.

Obras Pena Trevinca.

No referido ás obras na rúa Pena Trevinca e como resposta a preguntas do BNG, o Goberno local sinalou que o custe estimado dos traballos realizados, tamén a través dun contrato de emerxencia, estímanse en torno a 1,5 millóns de euros.