O BNG concéntrase de novo e esixe a concello e ADIF o cumprimento do convenio asinado para a execución das obras de mellora da permeabilidade no túnel de Ramón Puga e nos accesos a Tarascón

Momento da concentración no túnel de Ramón Puga 29.10.22
Momento da concentración no túnel de Ramón Puga

A formación nacionalista leva anos reivindicando a execución das obras e lembra que a día de hoxe existe un convenio asinado entre ambas administracións sen que haxa constancia na actualidade de que se teña avanzado nada na execución das obras

O BNG concéntrase de novo e esixe a concello e ADIF o cumprimento do convenio asinado para a execución das obras de mellora da permeabilidade no túnel de Ramón Puga e nos accesos a Tarascón

Ourense, 29 de outubro de 2022. O BNG levou a cabo na mañá deste sábado un acto reivindicativo nas inmediacións do túnel da rúa Ramón Puga, no barrio de Barrocás de Ourense. Tamén participaron decenas de veciñas e veciños da zona, quenes demandan a execución das obras previstas desde hai anos no túnel baixo as vías do tren que da acceso ao barrio.

Como ben lembran desde a formación nacionalista, en decembro de 2021, ADIF e o Concello de Ourense asinaron un convenio para a execución das obras de mellora da permeabilidade en ambas rúas.

No convenio recóllense ás obras a executar. Así, na rúa Ramón Puga, concretamente no punto quilométrico 244/881 da vía férrea Zamora – A Coruña, descríbese que o paso inferior existente baixo a vía férrea ten unha anchura moi reducida, o que provoca problemas de seguridade viaria tanto para os centos de vehículos que circulan por esa vía así como para os peóns, xa que non dispón de beirarrúas. O proxecto contempla a ampliación do paso inferior cun orzamento que ascende aos 709.224,22 euros IVE incluído.

A outra actuación prevista está na rúa Tarascón, para ser máis exactos no punto quilométrico 48/241 da liña férrea Monforte – Vigo. Neste caso, o paso elevado existente sobre a calzada non conta con beirarrúas e non é o suficientemente ancho como para permitir o paso de vehículos. O proxecto contempla a ampliación do devandito paso, obra orzamentada en 463.287,20 euros IVE incluído.

Estamos, segundo o Portavoz municipal e candidato á alcaldía Luís Seara, “diante dun investimento total que ascende a 1.172.511,42 euros, IVE incluído, e que tal e como figura no convenio asinado, será costeado ao 50% por ambas administracións, ou o que é o mesmo, 586.255,71 euros IVE incluído por parte de cada unha delas”.

Tamén lembran desde o Grupo municipal do BNG que, “dando cumprimento ao convenio, o oito de marzo de 2022, constituiuse no salón de Plenos do Concello, a Comisión de seguimento das obras, comisión formada por dous representantes de ADIF e dous representantes do Concello, naquela ocasión con presenza do propio rexedor Pérez Jácome”.

Trala constitución da comisión, ambas partes anunciaron públicamente que a licitación das obras estaba prevista para o mes de abril deste mesmo ano co obxectivo de que, realizada toda a tramitación administrativa necesaria, puideran comezar a súa execución este decembro e telas rematadas un ano despois, en decembro de 2023.

Desde entón, denuncia o BNG, “nada se sabe nin por parte do Goberno Local nin por parte do ADIF sendo, cada día que pasa, un día máis de perigo e risco de accidente en ambas zonas”.

O BNG recrimínalle ao Concello de Ourense, cofinanciador da obra e quen a día de hoxe si ten consignada a cantidade que lle corresponde, “que non se teña preocupado por esta cuestión e non teña esixido o cumprimento do convenio, e en consecuencia, impulsado a execución das obras á maior brevidade posible”.

O BNG anuncia que levará a execución do convenio ao Pleno municipal previsto para o vindeiro venres, catro de novembro.

faixa esixindo o arranxo do túnel 29.10.22
Faixa esixindo o arranxo do túnel 
O BNG concéntrase de novo e esixe a concello e ADIF o cumprimento do convenio asinado para a execución das obras de mellora da permeabilidade no túnel de Ramón Puga e nos accesos a Tarascón