O BNG considera aberrante que “en plena crise económica e social” o Concello de Ourense pretenda gastar preto de 92.000 euros na carpa instalada na Praza Maior

Rhut Reza e Luís Seara na Praza Maior

Da análise realizada polo Grupo municipal do BNG do expediente de contratación, despréndese que este ascende a 18.388,50 euros mensuais polo que de cumprirse as previsións anunciadas en Xunta de Área deste martes de mantela até marzo de 2023, o gasto total será de 91.942,50 euros

Rhut Reza, “arrepía a lixeireza coa que o Goberno Local dilapida cartos públicos”

O BNG considera aberrante que “en plena crise económica e social” o Concello de Ourense pretenda gastar preto de 92.000 euros na carpa instalada na Praza Maior

Ourense, 21 de outubro de 2022. Desde hai algunhas semanas e como consecuencia do capricho persoal do alcalde Gonzálo P. Jácome, unha enorme estrutura en forma de cúpula ocupa a práctica totalidade da Praza Maior de Ourense.

Segundo denuncia o Grupo municipal do BNG no Concello de Ourense, “estase privando á veciñanza dun espazo único e emblemático ao tempo que impide que os centos de visitantes que cada día pasan por ela, a poidan desfrutar na súa plenitude sendo ademais como é, a única Praza Maior inclinada de todo o Estado”.

Para o BNG o grave do asunto non é o feito de que se instale unha carpa, “de dubidosa necesidade”, para un evento en concreto senón o feito de que tal e como xa anunciou o Concelleiro delegado na Xunta de Área de Dinamización Municipal o pasado martes, “permaneza instalada até marzo de 2023”.

Desde o Grupo municipal do BNG pediron acceso, vista e copia ao expediente de dita carpa e unha vez avaliado polo miúdo, queren denunciar as desorbitadas cantidades que para o concello “vai ter un capricho persoal”.

O expediente de contratación e aluguer supón para as arcas municipais 18.388,50 euros ao mes polo que segundo a concelleira do BNG Rhut Reza, “ter unha carpa instalada sen ningún uso até o próximo mes de marzo, vainos custar ás e aos ourensáns nada máis e nada menos que preto de 92.000 euros mentras máis de 80 crianzas a día de hoxe non poden acudir ao comedor escolar porque o Grupo de Goberno di non ter cartos para abonarlle a bolsa á que teñen dereito”.

A maiores desta cantidade, Reza asegura que tamén puideron ter acceso ao contrato de traslado, instalación e desmontaxe e o cal ascende igualmente a 18.388,50 euros.

Para a formación nacionalista “non é xustificable ter unha carpa instalada en plena Praza Maior durante cinco meses e a razón de máis de 18.000 euros o mes cando estamos en plena crise económica e social, momento no que desde as administracións públicas cómpre atender en maior medida ás necesidades urxentes e vitais de moitas das nosas veciñas e veciños que peor o están pasando”.

Para Rhut Reza “é paradóxico que ao tempo que se anuncia unha modificación de crédito para dotar de fondos aos Servizos Sociais, algo que por certo desde o BNG víñamos advertindo desde hai tempo, se vaian gastar por empecinamento e capricho do alcalde preto de 92.000 euros nunha carpa”.

Reza insta ao alcalde a recapacitar e a “retirar a carpa unha vez remate a festa do Samaín e desista dunha infraestrutura tan cara e opte por outras opción máis económicas de cara o futuro”.

Vista actual da Praza Maior de Ourense
O BNG considera aberrante que “en plena crise económica e social” o Concello de Ourense pretenda gastar preto de 92.000 euros na carpa instalada na Praza Maior