O BNG entende que coa rutura das negociacións para unha moción de censura no Concello de Ourense por parte do PP “certifícase o que dixemos desde o comezo, o PP fixo un paripé pois nunca quixo censurar a Jácome”
Desde a formación nacionalista reiteran que na reunión do pasado vinte de xuño, “a sinatura do BNG para a moción de censura quedou escrita nun documento agardando polas outras trece, sete do PP e seis do PsdeG-PSOE”
“O PP xa non engana a ningúen. Quen acusa aos demais de pór liñas vermellas, resulta que rompe as negociacións porque o que quere é a Alcaldía do Concello de Ourense”
Ourense, 04 de xullo de 2024. Desde o Grupo municipal do BNG no Concello de Ourense reafirman o seu compromiso coa moción de censura proposta e cuxo obxectivo é que Gonzalo Pérez Jácome deixe de ser Alcalde. O seu Portavoz municipal Luís Seara lembra que, “na última reunión mantida, o BNG deixou a súa sinatura nun documento-proposta de moción de censura agardando polas outras trece necesarias para que prospere, sete do PP e seis do PSdeG-PSOE”, e engade, “sempre nos amosamos dispostos a, despois da moción de censura, traballar a prol da cidade e da súa gobernabilidade”.
Seara ten claro que “o PP nunca quixo censurar a Jácome, pois é con el con quen asinaron en 2019 e no 2023”.
Desde a formación nacionalista lamentan que unha vez máis “se crearan falsas espectativas en boa parte da veciñanza xa que o PP nunca tivo vontade de que a moción prosperase. Nós fomos moi claros desde o primeiro momento namentres que o PP, o único que fixo, ao igual que no mandato pasado, foi pór escusas constantemente, escusas que por certo, aseméllanse moito a iso do que tanto se queixan, liñas vermellas”.
O Portavoz nacionalista adianta que “desde o BNG seguiremos traballando arreo a prol da veciñanza e dos intereses de Ourense, ofrecendo unha alternativa real, seria e rigorosa” ao tempo que augura que, “coñecendo ao PP, voltarán sair ao rescate de Jácome cando sexa preciso e non tardaremos moito en velo”.
