Ourense, 17 de novembro de 2022. Bernardo Varela, voceiro do Grupo provincial do BNG na Deputación de Ourense e Luís Seara, voceiro do Grupo municipal do BNG e candidato á alcaldía do Concello de Ourense, rexistraron por escrito, no caso da Deputación e a través dunha petición formal no Consello Reitor do Consello Municipal de Deportes do concello, a esixencia de explicacións a Baltar e Jácome diante das últimas informacións xurdidas en torno á xestión do Club Ourense Baloncesto, mesmo co anuncio de querelas interpostas contra os mesmos polo actual accionista maioritario do clube.

Desde a formación nacionalista entenden que tanto o presidente provincial como o alcalde de Ourense, como máximos representantes do concello e da Deputación e responsables das mesmas na representación social do clube, deben aclarar cal é a situación actual a respecto do máximo accionista e se existen motivos para a preocupación por estas graves acusacións.

O Portavoz provincial Bernardo Varela e o Portavoz e candidato á alcaldía Luís Seara, manifestan nos seus escritos que “queremos trasladar a nosa preocupación ao respecto do clube máis senlleiro a nivel baloncestístico xa non só do concello senón da provincia. A pesares de non estar atravesando os mellores momentos deportivos, resulta máis preocupante a situación actual no que respecta á súa xestión administrativa”.

Na Deputación provincial, será na Comisión de deportes onde o deputado nacionalista Bernardo Varela aborde a cuestión.

No caso do Concello de Ourense, o BNG solicitará na reunión semanal do CMD, que sexa convocada unha reunión extraordinaria do Consello Reitor cuxo único punto na orde do día sexa a aportación de información e a avaliación da situación actual de Club Ourense Baloncesto.