Ourense, 23 de novembro de 2022. Na tarde de onte un camión de gran tonelaxe tronzaba unha das árbores da rúa do Paseo, feito que non é illado pero que revela, segundo o Grupo municipal do BNG no Concello de Ourense a pouca sensibilidade do actual Goberno Local para co noso patrimonio arbóreo.

Tal e como denuncia a concelleira nacionalista Rhut Reza, “resulta contraditorio que por unha banda o alcalde afirme que é preciso prantar 10.000 árbores na cidade e por outro destroce e aniquile continuamente a xa de por sí escasa masa arbórea existente”.

Segundo Reza, “a rúa do Paseo é unha rúa concibida para precisamente eso, o paseo e o lecer mais nas últimas xornadas e como consecuencia do capricho persoal do alcalde resulta intransitable por mor da instalación duns arcos excesivos para o tipo de rúa, ao noso entender, que fai que estea chea de camións de gran tonelaxe de xeito permanente”.

Rhut Reza tamén cuestiona a pouca sensibilidade e o nulo interese do Goberno Local polo patrimonio en xeral e polo arbóreo en particular, “manteñen durante días as estruturas apoiadas nas árbores, algunhas delas sen capacidade de aguante suficiente ao tempo que suxeitan as estruturas en fachadas e balcóns sen ningún tipo de control”.

Desde o BNG denuncian igualmente que para a instalación dunha árbore luminosa de gran tamaño “vaise tapar a fonte de Bispo Cesáreo, unha auténtica barbaridade”. Para os nacionalistas “nin hai planificación nin control algún, todo vai a golpe de ocorrencia do alcalde e consecuencia diso temos o caos instalado por todo o concello”.

Por último, os nacionalistas afirman que veñen de solicitar acceso aos informes de Policía Local, Bombeiros e do departamento de Medio Ambiente para cerciorarse de que as instalacións da rúa do Paseo cumpren con todos os requisitos e protocolos de seguridade e instalación necesarios xa que advirten, “non é a primeira vez que se vulneran todos os procedementos administrativos precisos”·