O BNG sobre as propostas de moción de censura en Concello de Ourense e Deputación: “nós estamos construíndo unha alternativa serie e rigorosa á lousa que supoñen 40 anos de gobernos do PP”
Os Portavoces do BNG no Concello de Ourense Luís Seara, e na Deputación Bernardo Varela, destacan que “o único certo que hai a día de hoxe é o acordo asinado en xuño de 2023 entre o PP e DO, todo o demais son roldas de prensa e mensaxes de whatsApp, ou sexa, fume”
Ourense, 31 de maio de 2024. Como consecuencia das propostas verbalizadas nos últimos días, por unha banda polo Grupo municipal do PSdeG-PSOE como pola remitida esta mesma mañá por Democracia Ourensana e nas que se propoñen senllas mocións de censura tanto no Concello de Ourense como na Deputación, o BNG, a través dos seus Portavoces en ambas institucións, Luís Seara e Bernardo Varela sinalan que “o Partido Popular fixo a Jácome Alcalde hai cinco anos, volveuno facer Alcalde hai un ano, pese a todo o acontecido no mandato anterior e non dubidamos que o voltarán facer Rexedor se o precisan dentro de tres”.
Os nacionalistas sinalan que “o primeiro que ten que facer o PP para ser cribe é que o seu máximo responsable, Alfonso Rueda e a súa Secretaria Xeral e asinante do acordo Paula Prado, rachen públicamente o mesmo e pidan disculpas á veciñanza de Ourense polo dano causado”.
No referido á proposta trasladada esta mesma mañá por Gonzalo Pérez Jacóme ao resto de Grupo políticos na Deputación, Bernardo Varela afirma que, “ao igual que o PP, Jácome terá que romper o acordo e pedir disculpas por ter feito a Luís Menor Presidente da Deputación”.
Para o BNG, a maior lousa que leva preto de 40 anos afectando a Ourense e facendo que cada vez sexa máis pequeno e irrelevante “chámase PP polo que non ímos facer nin Alcalde nin tenente-Alcalde a ninguén do PP. O BNG é a antítese a todo o que representan os Populares”.
Alternativa real, seria e rigorosa.
Ambos Portavoces coinciden á hora de sinalar que “no BNG estamos traballando arreo na construción dunha alternativa real, seria e rigorosa ao PP, a única alternativa, polo que non ímos perder o tempo en seguir alimentando o ruido que outros pretenden crear”, e engaden, “o BNG non ten ningún problema en reunirse nin en falar pero que deixen de enganar á veciñanza. Levamos tres anos falando de posíbeis mocións de censura e alimentando unhas expectativas que non son reais”.
Por último, no BNG destacan que, “o que está acontecendo estes días nin é serio nin ofrece credibilidade. O único que temos é un anuncio a través dunha rolda de prensa e unha suposta convocatoria a través dunha mensaxe de whatsapp, fume nada máis. O único real e certo é o acordo asinado en xuño de 2023 entre PP e DO”.
