Tereixa Paz afirma que urxe presentar un “recurso de inconstitucionalidade” contra a liberalización dos horarios comerciais para que os comercios en Ourense non pechen as súas portas definitivamente.

A cabeza de lista do BNG, Tereixa Paz participou hoxe nun acto en Xinzo sobre a actual situación do comercio no que afirmou “urxe presentar un recurso contra a liberalización dos horarios comerciais” ante a crise que padece o sector.

Na súa intervención, a candidata asegurou que o sector do comercio e pequenos empresarios representan un “sector básico para a economía das vilas e cidades galegas” polo que apelou a posta en marcha de políticas activas para facer fronte á “grave crise do sector comercial”.

 O comercio, sector básico para a economía de vilas e cidades

A nacionalista que percorreu diversos centros comerciais da vila acompañada do nº 2 da candidatura, Xosé Manuel Cid Fernández, o tamén candidato, Ramiro Rodríguez Suárez e o exdeputado, Alfredo Suárez Canal, manifestou que resulta necesario apoiar o financiamento das empresas e comercio a través de liñas especificas do Goberno galego así como a creación dunha “banca pública” destinada a potenciar o tecido produtivo galego.

Neste sentido, reiterou que o exercicio do autogoberno implica a presentación dun “recurso de inconstitucionalidade” contra os decretos lei que liberalizan os horarios comerciais e as temporadas de rebaixas o que está a perxudicar gravemente ao pequeno comercio.

 Detención alcalde de Ourense

A preguntas dos xornalistas sobre a detención do alcalde de Ourense, Francisco Rodríguez, Paz pediu “cautela” e agardar a coñecer en profundidade o acontecido ao fin de facer unha valoración de maior alcance “ dende o BNG confiamos en que se esclareza a maior brevidade posíbel para garantir o bo funcionamento da xustiza e o dereito á presunción de inocencia”.