Os cargos institucionais do Bloque Nacionalista Galego, Agustín Martínez, portavoz do BNG de Sarreaus; Sonia Vidal, deputada do BNG; María Mangana, deputada provincial e Bernardo Varela, portavoz do grupo provincial do BNG na Deputación de Ourense, achegaronse ao concello de Sarreaus para denunciar a situación de grave deterioro ambiental por contaminación que se está a vivir na contorna da lagoa de Antela, pola presenza dun barco afundido parcialmente que contén máis de 5.000 litros de gasoil, e que leva filtrando contaminantes desde hai dúas décadas sen que se tomaran medidas efectivas para poñer fin ao vertido.

O concelleiro do BNG en Sarreaus xa levou esta problemática a pleno, onde o goberno local recoñeceu o problema pero non tomou ningunha medida. “Isto foi levado ao pleno do Concello de Sarreaus. Alí díxose que si, que é necesario sacalo, pero ninguén é responsable disto”, declarou Agustín Martínez Folgoso, voceiro nacionalista no concello de Sarreaus, quen denuncia o abandono absoluto por parte do Concello e da Xunta de Galiza ante esta problemática.

A actual propietaria é a empresa Aliseda, vencellada ao Banco Santander, e sobre a que non se impuxo ningunha obriga legal para retirar os restos nin deter o vertido. “Ninguén puxo ningún tipo de obriga á debandita empresa. E, polo tanto, teremos que levalo a outras instancias para ver se desta forma se resolve o problema”, sinalaba “Tín” como é coñecido o voceiro do BNG de Sarreaus.

Diante desta situación, a deputada do BNG no Parlamento de Galiza, Sonia Vidal, anunciou que levará esta problemática ao Parlamento de Galiza  para que a Consellería de Medio Ambiente asuma as súas competencias e interveña de maneira inmediata. “Estamos ante un claro exemplo de abandono da Xunta e da Consellería de Medio Ambiente coa Limia. Hai un plan estratéxico metido nun caixón, e este é só un exemplo máis das consecuencias de non actuar”, denunciou a parlamentaria nacionalista.

Bernardo Varela, portavoz do grupo provincial do BNG na Deputación de Ourense, lembra que o barco abandonado é resultado dunha explotación fallida que rematou no ano 2009 tras un accidente mortal, e que desde aquela permanece na lagoa sen control, converténdose nun foco constante de contaminación nun dos espazos naturais máis sensibles das comarcas de Ourense.

Desde o BNG esíxese a retirada inmediata da embarcación, a descontaminación da zona e a restauración ambiental do espazo afectado, así como a asunción de responsabilidades por parte das administracións e empresas implicadas.