Ourense, 19 de setembro de 2025.  Logo da entrada en funcionamento do novo mapa de liñas do transporte público do Concello de Ourense deseñado polo Alcalde e logo de agardar a súa evolución ao longo dos días, o Grupo municipal do BNG compareceu esta mañá en rolda de prensa para valorar as consecuencias de ditos cambios.

O Portavoz da formación nacionalista Luís Seara comezou a súa intervención lembrando que “desde que o Alcalde anunciou o novo mapa de liñas até hoxe, o BNG mantivo unha actitude crítica pero ao mesmo tempo de prudencia. Manifestamos o noso desexo de que esta proposta mellorara o que había pero dixemos que eramos escépticos e anticipamos o que ía pasar”. Seara fixo fincapé no feito de que desde o seu Grupo se pedise con anterioridade que se analizara con rigor a proposta e se adiara a súa implantación, algo que o Rexedor “rexeitou”.

O Portavoz dos nacionalistas continuou afirmando que “a incertidume creada na veciñanza, a falta de diálogo co tecido social, a inexistencia de informes técnicos que apoiaran a proposta, os cambios continuos antes e despois da entrada en vigor, unido a que non se fixo unha proba previa para detectar as posibeis disfuncións e, en consecuencia, facer os necesarios reaxustes, ía colocarnos no peor escenario posible. Incertidume, falta de información e en consecuencia, caos e indignación na maioría da xente usuaria. Á vista dos feitos Podemos dicir con rotundidade que a proposta do alcalde é un absoluto fracaso”.

Neste contexto, os nacionalistas sinalan directamente ao Alcalde, Gonzalo Pérez Jácome como único responsable desta situación. “Empecinouse en modificar a totalidade do mapa de liñas cando o único que tiña que facer eran axustes. Empezou a casa polo tellado, mercando os buses antes de ter definido o mapa de liñas e descoñecendo as necesidades e características dos vehículos e como non hai unha sen dúas, agora quere facer o propio cos contedores do lixo”.

Mais o BNG levou a cabo nas últimas semanas e nos últimos días unha intensa axenda de interlocución social, “temos falado con moitas persoas, representantes veciñais, usuarios e usuarias, conductoras e condutores dos buses, ademais de comprobar por nós mesmos, vianxando en distintas liñas, a natureza dos cambios”.

“Temos información actualizada e veraz de cal é o resultado desta modificación e por tanto podemos facer unha valoración global. Quen gaña e quen perde con esta novo mapa de liñas. Perden os mozos e mozas que teñen que madrugar moito máis para poder chegar ás aulas en hora. Perden as persoas maiores e con problemas de mobilidade, porque agora terán que camiñar máis ou facer máis transbordos. Hai persoas que viven no Couto que para chegar á residencia teñen que facer até 3”.

“Perden as traballadoras e traballadores que ao rematar o seu turno de traballo non teñen transporte público. Perden as veciñas e veciños que teñen que padecer a incomidade de ir como sardiñas en lata nas principais liñas troncais, viaxando en buses que non están previstos para un número elevado de xente. Perde a mobilidade no conxunto da cidade, xa que ao ser liñas tan longas e facer percorridos como si dunha ximcana se tratase, acaba por disuadir a moitas usuarias e usuarios”.

Na súa exposición, Seara enumerou algunhas das liñas nas que as deficiencias son máis que evidentes como é o caso das liñas 1A - B, 3, 6, 7, 8, 11 ou 13 por exemplo, caracterizadas por incumprimento dos horarios, percorridos excesivos ou exceso de aforo pola falta de capacidade dos vehículos. Alén de que algúns dos percorridos establecidos provocan que as conductoras e conductores rocen o exceso establecido pola lei de 9 horas máximo de conducción.

Luís Seara tamén tivo palabras de lembranza precisamente para elas e para eles, as conductoras e conductores do Servizo, quenes están a sufrir nestes días as consecuencias do caos xerado polo Alcalde. “Esta situación de cabreo está a provocar que moitas veciñas e veciños canalicen a súa ira hacia os conductores e conductoras que non teñen ningunha responsabilidade e, pola contra, están a pór o seu gran de área para que isto deixe de ser un caos. Eu pídolle que non se equivoquen de responsable. O único responsable é o Alcalde e a el é a quen hai que dirixir as protestas. Porque está moi ben queixarse nas redes pero iso non é suficiente. Si queremos que nos teña en conta fagamos unha protesta masiva”.

Finalmente, o Portavoz do BNG no Concello, anunciou que “nós ofrecémoslle á cidadanía unha canle para canalizar esa indignación, polo que anunciamos que a partires deste luns, as e os Concelleiros do BNG, así como compañeiras e compañeiros perfectamente identificados, estaremos nas distintas paradas de bus da cidade para que todas e todos aqueles que o consideren oportuno, poidan asinar unha queixa xeral para que o Alcalde dea marcha atrás e corrixa todas aquelas cuestións que teña que correxir, previo diálogo social e cos informes e asesoramento das persoas que saben”.