O Bloque Nacionalista Galego ven de rexistrar unha petición ao goberno para solicitar que o Concello de Ourense, seguindo o exemplo de Concellos como Pontevedra ou Rianxo, retire as súas contas de Novagalicia Banco en solidariedade coas persoas estafadas polas participacións preferentes e subordinadas.

En palabras do portavoz municipal, Xosé Somoza, “o Alcalde ten mañá sábado na manifestación das estafadas polas preferentes unha oportunidade excepcional para anunciar que este Concello retira as súas contas de novagalicia banco”.

O BNG ven denunciando de forma reiterada no Parlamento Galego e no Congreso dos deputados a estafa sufrida polas galegas por parte das entidades bancarias e legalizada polo Partido Popular a través do decreto que permitiu unha quita que xa sobrepasa o 56% dos aforros das estafadas e que supón un espolio de máis de 500 millóns de euros dos aforros de todas as galegas e galegos.

Así o Grupo Municipal do BNG pide do goberno de Ourense un compromiso real coas afectadas e un acto de solidariedade e denuncia que xa se esta a realizar dende administracións locais nas que o BNG ten responsabilidades de goberno.

Ourense, 14 de xuño de 2013