Ourense, 06 de xullo de 2023. Foi no verán pasado, a mediados de xullo, cando se producía a desaparición no encoro de Velle de Alassane Gabe Ndiaye, un xoven veciño da cidade de 23 anos que aparecía días despois afogado a escasos metros das comportas do encoro.

Xa entón, reclamouse por parte do BNG e mesmo do Concello de Ourense á empresa encargada do mantemento e control da instalación, Naturgy, a adopción de todas as medidas de seguridade necesarias para impedir o fácil acceso ao encoro e evitar deste xeito, e dentro do posible, que aconteceran sucesos similares.

O certo é que tal e como denuncia o Portavoz do BNG no Concello Luís Seara, “pasou case un ano e Naturgy continúa sen controlar o acceso aos pantaláns do encoro, inaccesíbeis por outra banda para os diferentes equipos de emerxencias polo que a día de hoxe, calquera incidente pode rematar en traxedia tal e como desgrazadamente aconteceu o verán pasado”.

No BNG din que “a Polícía Local non pode estar continuamente vixiando zonas e propiedades de empresas privadas que teñen a obriga de exercer ese traballo polo que pedímoslle ao Goberno Local que se dirixa a Naturgy e lle esixa a adopción de todas as medidas de seguridade que estimen oportunas co fin de evitar o acceso libre e incontrolado aos pantaláns e polo tanto ao encoro”.

Seara insiste, “existe lóxicamente unha responsabilidade individual de cada un á hora de decidir non facer caso á sinalización existente na zona máis con todo, entendemos necesario que polo menos, durante o periodo de verán, a empresa incremente as medidas de seguridade para evitar incidentes e sucesos tráxicos coma os vividos”.

Por último, desde o BNG entenden preciso tamén que “entre o Concello, a CHMS e Naturgy se melloren e amplíen as zonas e os accesos previstos para os equipos de emerxencia. Cómpre que estes poidan actuar coa maior rapidez e polo tanto que cando teñan que actuar no encoro ou no río non atopen máis dificultades da que xa de por si provoca a orografía da zona”.