Ourense, 01 de abril de 2025. Hai un par de semanas, o Grupo municipal do BNG anunciaba o rexistro dunha moción para ser debatida no Pleno ordinario do mes de abril e na que solicitaría a reprobación de Jácome pola súa xestión na compra dos denominados “busitos”. Dito e feito, os nacionalistas formalizaron dita petición polo que o actual Rexedor terá que someterse á mesma.

Na exposición de motivos, o BNG fai un breve percorrido por todo o acontecido coa adquisición dos corenta autobuses mercados polo Concello, cun gasto lixeiramente superior aos catorce millóns de euros pero facendo especial fincapé no primeiro dos lotes, consistente en quince unidades de minibus con motor diésel cun importe total con IVE de 2.722.500 euros.

O Portavoz do BNG Luís Seara sinala, “nada hai que dicir dos autobuses dos lotes dous e tres, subministrados por Scania e por UNVI, empresa ourensá e de referencia mundial no sector, os cales cumpren perfectamente coa súa función” e engade, “cousa distinta acontece coas unidades do lote un, é dicir, cos busitos. Vehículos dos que o Alcalde se amosaba especialmente orgulloso malia que xa antes da súa adquisición, existían moitas dúbidas sobre a súa idoneidade e sobre as súas prestacións pois xa era coñecido que estaban a dar problemas noutras cidades”.

O certo é que iniciaban a súa andaina en decembro de 2023 e desde entón, “son constantes as avarías sufridas e relativas a fallos nas aperturas das portas, no sistema de calefacción e aire acondicionado, nas rampas, nos paneis luminosos ou nos acabados interiores, chegando ao punto de desprenderse partes do mesmo, por non falar da escasa capacidade que teñen, o que provoca que haxa momentos nos que usuarias e usuarios teñan que quedar nas paradas por falta de espazo”.

Para o BNG, a compra dos busitos revela “a neglixente e economicamente ruinosa xestión levada a cabo polo actual Alcalde Gonzalo Pérez Jácome, único responsable do que está acontecendo” e sinalan, “desta volta non hai técnicos aos que culpar nin informes aos que aludir. Falamos de vehículos que non cumpren coa súa función, que supoñen unha sangría económica para as arcas municipais e mesmo un risco para a seguridade das e dos traballadores e das e dos usuarios do Servizo”.

Seara ten claro que “correspóndelle ao Alcalde asumir o seu erro e dar explicacións de por que o seu empecinamento na compra destes vehículos pese ás advertencias recibidas, correspóndelle asumir o seu erro e pedir perdón a toda a veciñanza de Ourense ante o que consideramos unha das maiores estafas vividas no Concello así como aportar solucións a un problema que xera unha importante inquedanza social e que dificulta o correcto funcionamento do Servizo de transporte ao non poder dispor de boa parte dos vehículos destinados ao mesmo”.

Situación cafetería Xardín Xaponés.

O BNG tamén rexistrou por escrito unha batería de preguntas en relación á situación da cafetería sita no Xardín Xaponés. Desde a formación nacionalista argumentan que o pasado 15 de outubro de 2024, vía Decreto, acordouse resolver o contrato de concesión demanial a causa do incumprimento culpable do contratista consistente na cesión non autorizada a terceiros. En consecuencia, o BNG preguntará:

1. Como é posible que pese a terse decretado o pasado 15 de outubro de 2024 a resolución do contrato por unha cesión ilegal a terceiros, ditos terceiros sigan, a día de hoxe, traballando no citado local?

2. Existe na actualidade contrato en vigor entre o Concello de Ourense e algún particular ou empresa para a explotación da cafetería sita no Xardín Xaponés?

3. Se como consecuencia da resolución do contrato o pasado 15 de outubro, xa se realizou a liquidación correspondente ao canon até a data da mesma, desde o 16 de outubro á actualidade que cantidades está percibindo o Concello pola explotación do local?

4. Por que motivo, pese a terse decretado, non se procede ao cese de actividade no local para a súa posterior, de ser o caso, licitación e adxudicación?