Ourense, 14 de agosto de 2020. No día de onte tívose constancia de sendos incidentes acaecidos no parque de San Lázaro coa caída dun tilo de grandes dimensións próximo a zona de xogos infantís, e a rotura dun banco no xardín do Posio, provocando feridas leves en ambos casos. Desde o BNG gábanse en primeiro lugar de que non houbese danos persoais de maior consideración ao tempo que alertan da situación e do estado xeral de conservación da cidade.

Para a formación nacionalista o acontecido nas últimas horas revela o estado de abandono e de deterioro no que se atopa a cidade de Ourense no que a espazos públicos, parques, xardíns e mobiliario urbano se refire. Para Rhut Reza, concelleira do BNG "Unha situación arrastrada desde o anterior mandato do PP pero que lonxe de mudar no actual, vese agravada día a día sen que o goberno municipal de PP - DO actúe para evitalo".

Para o grupo municipal do BNG no Concello de Ourense esta situación pon en risco a integridade da veciñanza ao tempo que contribúe a expulsala duns espazos públicos deteriorados, duns parques e xardíns que languidecen e que supoñen un risco, o que contribúe a crear a imaxe dunha cidade envellecida e abandonada.

Fronte a esta situación e segundo os nacionalistas temos a "nada". Un goberno municipal sen un proxecto de cidade claro e definido, un goberno que non conta cunha folla de ruta que avalíe e de resposta rápida á situación de deterioro do espazo público, "cunhas brigadas de xardiñería e mantemento  lastradas pola falla de persoal" suficiente para atender tódalas necesidades existentes e coma consecuencia, un agravamento da situación que por desgraza, comeza a afectar directamente a veciñas e veciños de Ourense, os cales se ven involucrados en incidentes coma os acaecidos nas últimas horas.

Para o BNG o goberno actual non ten xustificación ante esta situación, lembran os nacionalistas que o actual bipartito PP-DO leva xa máis dun ano de mandato sen que se adoptaran as medidas oportunas e se crearan os plans de acción precisos para mudar a situación de mantemento da cidade.

Os nacionalistas destacan ademáis que non soamente non se conserva o patrimonio existente senón que mesmo se degrada aínda máis con actuacións coma a de trasladar o skatepark ao Couto ou con podas e talas moi desafortunadas. Incíden igualmente na necesidade de coidar e mellorar o patrimonio recibido mais é necesario coñecer cal é o estado de saúde das nosas árbores, polo que faise preciso unha auditoría para coñecer o estado dos nosos parques e xardíns.

Desde o BNG incídese en que vivimos nunha cidade cun potencial natural enorme, pero que por desgraza contamos cun goberno sen ideas e sen proxecto para dinamizalo e polo en valor, para a concelleira Rhut Reza "temos un goberno que improvisa día a día e que non se centra en solventar os problemas reais da cidade".

Un goberno que, para o BNG, fantasea coa intelixencia artificial ou mesmo con cidades xardín (sen ter moi claro o concepto ao que se alude) pero que é incapaz de xestionar o día a día dunha cidade cun potencial espectacular en moitos ámbitos.