O domingo 4 de marzo Ourense será escenario da andaina “Ourense Capital Termal”. Con esta edición, que é a novena, iníciase o calendario de andainas, xa que é a primeira do ano. Así o explicou esta mañá o Concelleiro de Deportes, Fernando Varela, quen destacou que “neste tempo de recortes, para nós é importante seguir a fomentar actividades que son saudábeis para as persoas”.

A proba está organizada pola Concellaría de Deportes e o Clube Ourensano de Cultura e Ocio (CUCO). A presentación tivo lugar esta mañá no Salón de Plenos coa presenza, ademáis do nacionalista Fernando Varela, de José Willy García Calvo, director da proba, Manuel Mosquera, Xerente do CMD e José Ramón Pérez Nieto, do Grupo Pérez Rumbao, patrocinador da andaina.

O percorrido desta IX edición será de 28 quilómetros e descorrerá pola beira dos ríos Miño e Loña, atravesando lugares emblemáticos da cidade como son o Castro de Santomé, o Camiño de Santiago (Vía da Prata) ao seu paso por Cudeiro e Sartédigos, e fundamentalmente pola zona termal do Río Miño, polas termas do Muíño e de Outaríz. Tal e como explicou Fernando Varela “aparte de apoiar estilos de vida saudábeis, pomos en valor as nosas zonas e o noso patrimonio”. O Concelleiro nacionalista, tamén tivo palabras de agradecemento para todas as persoas que fan posible o desenvolvemento da andaina, traballadores, patrocinadores así como outras concellarías coma transportes e limpeza que fan posíble que todo decorra con total normalidade.

Willy García comentou cuestións técnicas que rodean a esta edición. A inscrición ten un custe de 7 €, e poderase facer entre os días 13 de febreiro e o 3 de marzo no Pavillón dos Remedios, o nas oficinas de Nova Galicia Banco e La Caixa. Co comprobante do pagamento, realizarase a inscrición no propio Pavillón dos Remedios ou en Deportes Redonet.

“Non é unha proba competitiva, é unha proba participativa”, polo que o director anima a todo o público maior de 16 anos a apuntarse a esta edición. Ademáis o porcentaxe de baixas e lesións é moi reducido. O pasado ano, 482 persoas participaron na andaina que ten un límite de 500 participantes. En definitiva un día para as persoas que desfruten de camiñar e da fermosa contorna do perímetro rural da cidade.

Ourense, 8 de febreiro