Ourense, 04 de decembro de 2023. Se por algo se caracterizou a semana pasada a nivel municipal foi pola intención do Goberno Local de aprobar dous novos expedientes de modificación de crédito, concretamente o 22P e o 23P/2023 e que pretendían mobilizar algo máis de 5,5 millóns de euros.

No Pleno convocado e celebrado o pasado martes día 28, tal e como lembra o Portavoz municipal Luís Seara, “o Grupo municipal do BNG advertiu que en ambos casos, faltaba o Informe fiscalizador da Intervención municipal, informe preceptivo e necesario para a correcta conformación dos expedientes e que ante a súa ausencia, o BNG non ía participar do Pleno como así ocorreu finalmente”.

O pasado venres e xa no Pleno ordinario, o Goberno Local volveu incluir ambos expedientes na orde do día pero nas mesmas condicións que no Pleno do martes, e dicir, sen estar informados pola Intervención, motivo polo que “nós non ratificamos a súa inclusión na orde do día para seren debatidos”.

O Alcalde volveu victimizarse acusando ao Interventor municipal e a Oposición por facerlle seguidismo e por negar crédito a cuestións que segundo cualificou “son de vital importancia para a cidade”.

No día de hoxe e unha vez coñecida a acta da Xunta de Goberno Local na que ambos expedientes foron aprobados, certifícase que o Oficial Maior accidental, advertiu antes da súa votación que os expedientes, “estan incompletos, ao carecer do informe da Intervención Municipal e, que, por tanto, o acordo que se adopte pode ser nulo de pleno dereito ou anulable, coas demais consecuencias xurídicas que estas declaracións poden conlevar noutros ámbitos do ordenamento xurídico”. Pese a estas advertencias, os membros da Xunta de Goberno Local decidiron aprobar os dous expedientes.

Para o Portavoz municipal do BNG a acta da XGL “é trememdamente reveladora e desmonta todo o argumentario de Jácome de querer victimizarse e de pretender establecer unha especie de contubernio entre o Interventor e a Oposición”, e engade, “xa non é que sexa a Intervención municipal a que advirta das irregulariedades na conformación dos expedientes, ou que o denunciemos desde o BNG negándonos ademais a ser partícipes, senón que na propia XGL, os membros do Goberno e o Alcalde sabían que o que estaban aprobando non se axustaba a dereito e aínda así decidiron continuar”.