Ourense, 14 de decembro de 2023. O Grupo municipal do BNG ven de preguntar no Consello Municipal de Deportes a respecto de cal é a situación na que se atopan as facturas correspondentes coa impresión e unha terceira de redacción da revista “o Concello do deporte”. Segundo sinala o Portavoz nacionalista Luís Seara, “o Goberno Local, por voca do Presidente do CMD Anibal Pereira, comunicou que había unha reclamación xudicial por parte dos que fixeron o traballo encargado, e que o Concello terá que comparecer na xustiza no 2024”.

O representante nacionalista no CMD, Luís Seara, explica que o BNG votou en contra “ao advertir o Interventor dun fraccionamento do contrato co obxecto de eludir os requisitos relativos ao procedemento de adxudicación, tal e como establece o artigo 99 da lei de contratos, lei 9/2017 de 8 de novembro”.

Nesa mesma reunión, o portavoz do BNG preguntou quén fora o responsable da contratación das revistas, manifestando o Alcalde que “a revista foi encargada por Alcaldía e á marxe do CMD”, cando tivo responsabilidade logo da primeira saída do PP do goberno.

O acontecido, por desgraza, advirten no BNG “non é novidade”. “Son moitos os casos nos que se contrata vulnerando os procedementos. Agora estamos diante dun proceso xudicializado, toda vez, as empresas reclamaron vía xudicial, co que teremos que pagar o importe das revistas máis os xuros de demora, que na actualidade rondan o 10%”.

Segundo Luís Seara, “isto bota por terra o argumento esgrimido polo Alcalde nun Pleno recente no que nos respostou que as empresas, agás as multinacionais, non reclamaban e que por tanto o Concello non ten que pagar xuros de demora”.