Día da Patria Galega: Rescata os teus Dereitos!

Día da Patria Galega: Rescata os teus Dereitos!

O BNG chama a un Día da Patria Galega 2012 masivo para dicirmos alto e claro que o que hai que rescatar non é a banca privada, senón os nosos dereitos. Os dereitos nacionais e os dereitos sociais. Por iso o lema escollido polo BNG para a campaña do Día da Patria Galega 2012 é precisamente Rescata os teus Dereitos. En Bloque Podemos! E claro que podemos, se traballamos cóbado con cóbado coa sociedade galega, unha sociedade que, lonxe dos tópicos, si se move e si defende os seus dereitos.

O BNG ten programado unha intensísima campaña preparatoria do Día da Patria Galega 2012 con infinidade de actos -macro e micro- ao longo e ancho do país. Cartaces. Folletos. Discursos. Moito contacto porta a porta e a pé de rúa.

En Ourense a campaña comezará cun Acto Político e unha cea no Campo da Feira o venres 13 de xullo a partir das 21.00h no que intervirán Francisco Jorquera, Tereixa Paz e Isabel Pérez. A partir dese día o BNG de Ourense programou repartos de material en varios puntos da cidade. Contaremos coa visita de Guillerme Vázquez o 19 de xullo e realizaremos un reparto de bandeiras para enchermos as fiestras e balcóns da cidade con bandeiras da patria. O luns 23 de xullo ás 20.30h realizarase, dentro da campaña, un acto político na Praza de San Martiño.

Acto central, a grande manifestación patriótica

Coma sempre, o acto central da campaña será a grande manifestación que sairá o 25 de Xullo da Alameda (12 horas) e que concluirá na Praza da Quintana, con especial destaque para os discursos do portavoz nacional e do noso candidato á presidencia da Xunta, Guillerme Vázquez e Francisco Jorquera, respectivamente.

Mais haberá tamén espazo para o lecer e para o convivio: un Festigal xa incontornábel e xa por méritos proprios referente do verán galego, que durante 48 horas, xa desde o 24 de Xullo, encherá de enerxía o campus sul da USC.

Día da Patria Galega: Rescata os teus Dereitos!