Cal é a situación dos servizos sociais nos concellos de Ourense?
Trátase de abarcar a toda a poboación, a da vila e a do rural. En Allariz o Concello asume todo o esforzo no programa Xantar sobre rodas, que presta servizo a 59 usuarios, persoas ás que lles levamos a comida. Tamén prestamos axuda a domicilio, tanto básica como a dependentes, con nove auxiliares traballando neste servizo. É unha dotación insuficiente porque hai lista de espera. Precisamos máis persoal, e iso depende da Xunta. Desde a Xunta dinnos que se van a aumentar horas, pero fano moi lentamente e así non se pode cubrir a demanda. En torno ao 70% do esforzo en servizos sociais é asumido polo Concello. A achega que fai a Xunta, tanto de persoal como orzamentaria, é insuficiente. 

Como evolucionan as necesidades da poboación?
En canto aos maiores, a nosa política é axudalos para que poidan seguir na casa e vivir no seu entorno. Pero o máis significativo é a situación de emerxencia social. É moi grave. Tanto, que mesmo hai xente con traballo en risco de exclusión social. Casos nos que o salario non garante a subsistencia. No caso de Allariz, o Concello asume totalmente os gastos derivados de proporcionar alimento ou pagar as facturas da luz ou da auga cando é preciso.

Como defines a política social da Xunta nestes últimos anos?
Houbo un retroceso evidente nun momento moi delicado. O que sucede coa lei de dependencia resume esa política. A lei está aí, pero non se cumpre, hai tardanza nas valoracións, nos pagamentos... hai unha lista de espera que non debería haber. Recórtase o gasto mentres aumenta o número de persoas que necesitan axuda. O retroceso respecto das políticas do bipartito tamén é claro no campo da igualdade. E aquí teño que subliñar que a maioría dos casos de violencia no fogar teñen que ver coa crise económica que estamos sufrindo.

Cal foi a resposta da Xunta a esta crise social?
Está ben claro, xa o dixen: mentres aumentan as necesidades sociais, baixa o gasto social da Xunta. Os concellos son os que están soportando a maior parte do peso.

Cal é a situación dos traballadores dos servizos sociais?
Hai moito traballo. Asumen máis do que se debería nunha situación normal. É necesario máis persoal. 

Que é o primeiro que debería facer un novo goberno na Xunta en benestar social?
Recuperar a lei de dependencia e dotar aos concellos de máis recursos. Iso é o urxente.

Desde a túa experiencia profesional, como está a sanidade?
Cando estudante fixen prácticas no Hospital de Caridad. Pois ben, a sanidade pública estana levando cara un servizo de caridade. Pola deriva que leva, non pasará moito ata que nos vexamos outra vez naquela situación. Levan moitos anos minando a sanidade pública.

Por que participas desta candidatura do BNG ao Parlamento galego?
Estou na candidatura do BNG porque amo ao meu país, a miña cultura, a miña lingua, e sobre todo porque quero loitar contra esta desfeita e polo meu país. Estou orgullosa de formar parte desta candidatura.