Intervención do Portavoz Municipal, Xosé Somoza, no pleno de debate do estado do Concello

Ourense é unha cidade que sofre nestes momentos unha serie de graves

problemas: desemprego, desafiuzamentos, abusos bancarios, fractura social, falta de actividade económica, peches de empresas, Expedentes de Regulación de Emprego, pobreza. Problemas que non podemos descontextualizar dunha dinámica que afecta a todo o país e a todo o Estado. Non podemos falar de Ourense como se fóra un anaco de terra illado do resto da provincia ou do resto do país.

Este é certamente o debate sobre o estado da cidade, pero non podemos deixar de poñer sobre a mesa unha serie de problemas dun ámbito maior e tamén dunha responsabilidade maior en tanto que eses problemas condicionan por completo as políticas que se poden desenvolver desde o Concello.

Asistimos desde hai tempo, antes incluso da data marcada neste pleno, a unha paulatina perda da capacidade de decisión das administracións locais e dos gobernos autonómicos, unha negación interesada do principio de subsidiariedade que obriga a achegar a administración ao administrado. Unha corrente de recentralización do Estado pactada polas dúas grandes organizacións políticas que pretenden así perpetuar o bipartidismo, atrevéndose incluso a modificar arbitrariamente a noutros casos sacrosanta Constitución.

Nós, o Grupo Municipal do BNG, denunciamos que ese é precisamente o camiño que nos leva a non saír do pozo, a supeditar o futuro da nosa nación aos intereses doutras institucións. O BNG ten claro cal debe ser a senda que leve ao noso país, a Galiza, a ter un futuro diferente ao que nos impoñen desde fora. Unha folla de ruta que teña como obxectivos unha maior xustiza social, a posibilidade real de desenvolver as nosas capacidades produtivas e ter voz propia nas institucións europeas e mundiais que están escribindo o noso destino, sen que nós, como pobo, sexamos capaces de variar unha triste coma.

A nosa nación debe ser consciente da gravidade do momento e explicarse nese contexto os procesos políticos e os resultados electorais recentes que se deron nas outras dúas nacións históricas do Estado español, Euskadi e Catalunya, e comprender tamén desde ese punto de vista o total rexeitamento das forzas políticas de carácter

estatal a posibles consultas populares que podan supoñer unha reorganización do Reino de España, e refírome por suposto ao PSOE e ao PP, pero tamén a IU.

Galiza revive hoxe no século XXI as mesmas discriminacións que denunciaron persoas como Rosalía de Castro, Castelao, Bóveda, Otero Pedrayo ou Vicente Risco, e a saída que escolle o pobo, a mesma que tomou noutros momentos de crise estrutural, e que recolleu recentemente o New York Times, facer a maleta, deixar a familia e emigrar. Dicía Castelao, “o galego non chora, o galego emigra”. Agora, como antes, a única ferramenta política para mudar o noso destino é a soberanía.

Os resultados electorais de 2011, malos para o BNG, non obstante permitiron continuar co goberno en coalición que se iniciara en 2007. Para chegar a ese acordo asinouse un pacto de goberno que entre outras cousas fixaba as delegacións competenciais que serían responsabilidade do BNG.

O BNG formou parte do goberno da cidade desde 2007 e ata 2012, e aínda que nese período cometemos algúns erros, temos claro que fomos o verdadeiro motor de transformación de esta cidade. Veremos agora sen o motor como anda o coche.

Gobernar é tomar decisións e non en todas as ocasións esas decisións son as máis acaídas, como pode acabar demostrando o paso do tempo e nese caso o que se debe facer é rectificar.

Grazas ao BNG por primeira vez gobernouse cun proxecto de cidade integral e a escala humana, no que todos os barrios e parroquias do Concello tiveron a mesma importancia

• Grazas ao BNG a cidade redescubriu o termalismo como o seu feito diferencial, como o sinal da súa identidade tradicional e milenaria.

• Grazas ao BNG Ourense é a capital termal de Galiza e é socia fundadora da Rede Euripea de Cidades Termais.

• Grazas ao BNG centos de veciños e veciñas puideron rehabilitar as súas vivendas nos barrios do Casco Histórico, O Polvorín, A Carballeira, As Camelias e no núcleo rural de Seixalbo.

• Grazas ao BNG a poboación pode pasear por rúas humanizadas onde o peón ten prioridade no Casco Histórico, no centro, no Couto, no 21, na Ponte, en San Francisco ou nas Lagoas.

• Grazas ao BNG as mulleres de Ourense tiveron por primeira vez verdadeiras políticas de igualdade e un novo edificio onde poder ser atendidas.

• Grazas ao BNG a cidade recuperou o seu singular e identitario ciclo festivo.

• Grazas ao BNG as persoas que practican deportes minoritarios e forman parte de clubes modestos tiveron o apoio que precisaban e que outros non lle concedían

• Grazas ao BNG a cidade conta con máis instalacións onde practicar todo tipo de deportes e pronto será realidade o novo polideportivo de Mariñamansa.

• Grazas ao BNG os mozos e mozas de Ourense tiveron novas posibilidades de participar en programas de intercambio internacionais

• Grazas ao BNG, a cidadanía pode hoxe pasear con seguridade polo parque forestal de Montealegre

A maioría de estes logros xa os citou antes o Sr. Alcalde na súa intervención de 30 minutos, pero sen mencionar que foi o BNG quen os fixo posibles. Por certo, Sr .Alcalde, a reunión sobre o PXOM é hoxe a tarde, agora o que toca é o debate sobre o estado do Concello.

O pacto de goberno que asinamos non foi cumprido polo PSOE en toda a súa extensión e houbo algunhas cuestións que xeraron fases de tensión interna, como as duplicidades, unha política de persoal con claroscuros, ou un tratamento económico distinto segundo a atribución política dos concelleiros.

A progresiva perda de confianza co socio de goberno tivo o seu último episodio con luz e taquígrafos, coa negativa inicial do anterior alcalde a dimitir, como nós lle solicitamos polo seu propio ben e o da institución á que representaba, o que finalmente provocou

como todos saben a nosa definitiva saída do goberno.

A partir de entón a historia é moi recente. Apoiamos a investidura do actual alcalde pero con unha mensaxe clara, o BNG fará unha oposición construtiva e facilitará a gobernabilidade de Ourense pero non con un cheque en branco. Sempre que o grupo de goberno actúe en beneficio da cidadanía e atenda as súas necesidades na procura dunha maior xustiza social recibirá o noso apoio, e mentres, o Grupo Municipal do BNG, a través dos plenos, tratará de levar a cabo as propostas inseridas no programa co que nos presentamos as eleccións municipais, como sucedeu recentemente co desbloqueo urbanístico da zona propiedade de Xardín de As Burgas, ou o billete de autobús gratuíto para as persoas desempregadas.

En canto ao futuro, as propostas para 2013 só poden ir encamiñadas a reverter a dramática situación que padecen miles de veciños e veciñas. Enfrontámonos a maior taxa de desemprego das últimas décadas, a maior etapa de destrución de emprego da nosa historia e esa debe ser a liña argumental básica. Promover a creación de emprego

desenvolvendo os nosos recursos potenciais e asegurando a asistencia social a aquelas persoas e colectivos que máis están a sufrir a crise. Na consecución de este obxectivo teñen unha influencia fundamental os futuros orzamentos do Concello de Ourense.

Orzamentos que van a chegar tarde sen que nesta ocasión o Partido Popular poda argumentar que é o BNG o que dificulta a súa presentación en tempo e forma.

Nunha recente comparecencia pública, o BNG expuxo cales eran as premisas que eses orzamentos debían cumprir para ser apoiados polo noso Grupo Municipal.

1? En primeiro lugar que definan con claridade unha aposta decidida por xerar emprego e polo fomento das iniciativas empresariais que desenvolvan recursos locais, tendo no termalismo o eixo estruturante da súa economía urbana.

2?En segundo lugar, o Concello de Ourense debe ampliar o investimento

social. Coa crise socioeconómica creada polo neoliberalismo imperante é de vital importancia protexer e axudar as persoas máis necesitadas. Por iso consideramos que na estrutura xeral dos orzamentos debe remarcarse una actitude decidida por parte do goberno da cidade na procura dunha maior redistribución da riqueza, primando ás áreas de Benestar, Igualdade, Mocidade

e Participación Cidadá.

3?En terceiro lugar, o BNG entende que os orzamentos deben promover a

creación dunha cidade integral, unha cidade máis xusta i equitativa, na que todos os seus habitantes disfruten dos mesmos dereitos independentemente do lugar no que residan.

4? En cuarto lugar, o Concello de Ourense debe deixar claro nos orzamentos á promoción e valorización dos feitos culturais que definen a esta cidade como parte da nosa nación. A difusión da cultura galega e en galego, o apoio as empresas culturais locais, ou a recuperación do patrimonio popular e a rehabilitación dos núcleos históricos da nosa periferia rural.

5? Por último, o BNG considera que estas premisas non deben supoñer en ningún caso un sobrecuste que incremente o montante global orzamentado, nun contexto xeneralizado de crise económica. Todo o contrario, o orzamento debe axustarse eliminando gastos superfluos, duplicidades entre as concellerías, gastos protocolarios excesivos ou custosas campañas publicitarias.

Xa lle advertimos ao Sr. Alcalde que non se equivoque na hora de elaborar os orzamentos, que non pretenda con eles restañar feridas internas nin contentar ao seu equipo de goberno cun reparto equitativo entre concellerías. O BNG quere uns orzamentos que atendan as necesidades da cidadanía, e o que se debe facer en tempos de carestía e saber priorizar.

Por último, o Grupo Municipal do BNG considera que este pleno extraordinario debe servir para marcarse uns obxectivos claros que podan ser verificables dentro dun ano. Necesitaremos do consenso das catro forzas representadas neste pleno para acadalos, pero queremos manifestar que desde logo conseguilos non vai ser pola falta de

empeño do BNG.

O indicador fundamental, xa o dixemos, debe ser o emprego. Por iso, o BNG lanza o seguinte reto, conscientes da gravidade da situación e do posible empeoramento a curto prazo pola dinámica negativa de moitas empresas locais, que poden presentar novos EREs e botar a máis persoas á rúa. Hoxe en día máis de 11.250 persoas están desempregadas na nosa cidade e a cifra posiblemente se incremente se non intentamos

poñer en marcha proxectos hoxe en día paralizados. Por iso é fundamental continuar o desenvolvemento de infraestruturas xa iniciadas como os centros de saúde do 21 e do Couto, o Centro de Interpretación dos Parques Naturais, a nova sede da Confederación

Hidrográfica ou o novo Pazo de Xustiza, así como novas infraestruturas como a ronda termal, o Centro de novas tecnoloxías da Muiñeira ou o futuro centro turístico termal das Burgas. Debemos activar a economía local desde o Concello pero coa complicidade das

outras administracións co obxectivo de rematar coa destrución de emprego e que en xaneiro de 2014 o índice de paro se reduza, polo menos, nun 10% respecto as taxas actuais.