Desde o Grupo Municipal do BNG laméntase o “desafortunado exemplo” que deu onte o principal grupo da oposición local, ao “colarse nunhas instalacións municipais aínda non abertas á cidadanía” nunha actitude impropia de responsables políticos que mesmo “incita ao vandalismo”. Especialmente, cando a concellaría de Medio Ambiente sempre ten amosado a súa total dispoñibilidade a facilitar calquer información solicitada sobre Montealegre ou calquer outro tema relacionado ca área.

A concelleira de Medio Ambiente desexa deixar claro unha vez máis que “Montealegre non é un xardín botánico” e que as críticas de Fernández son totalmente infundadas. As instalacións actuais cumplen co estipulado co proxecto técnico aprobado no seu momento, e así o entederon os técnicos do Estado ao emitir os seus informes positivos. En ningún momento se contemplaba dotación para un futuro laboratorio. Cómpre lembrar, ademais que a propia concellaría xa rexeitara parte das facturas emitidas pola empresa encargada do suministro por non constar no expediente, o que supuxo un aforro para o Concello de Ourense. O resto dos materiais si recibidos (ordenadores, pantallas informáticas…) atopánse aloxados en dependencias municipais como medida de seguridade, xa que o parque aínda non conta con sistema integral de vixiancia.

Marta Arribas resta importancia ás acusacións do voceiro do PP, parecéndolle “prepotentes e arrogantes” xa que para ela “o verdadeiramente importante e que fai un mes que os técnicos do Ministerio deron o respaldo ao proxecto e dende logo para nós son fontes bastante máis fiables que o que diga o señor Rosendo Fernández”. Sorprende, polo tanto, o desacordo manifesto entre os populares nunha e outra administración.

Para a concelleira de Medio Ambiente, o responsábel do PP local “debería deixar de confundir aos cidadáns e pensar máis as cousas antes de falar”, ademáis de que “probablemente aportaría máis a esta cidade se loitara en contra da paralización do centro de interpretación de parques, paralizado pola Xunta do PP en vez de tentar centrar a axenda municipal en cuestións xa resoltas”.

Ourense, 4 de abril de 2012.