A concelleira de Cultura e Turismo, Isabel Pérez, e o fotógrafo Xurxo Lobato, inauguraron a exposición O país das vacas. A obra busca ser un tributo visual á vaca, explicar como vive, de que vive e quen vive dela, e pór en valor o sector gandeiro galego.

A exposición, patrocinada por Larsa e que poderá visitarse en Ourense ats o 30 de abril, conta con 132 imaxes da autoría do fotógrafo galego que foxen do bucolismo para adoptar un carácter divulgativo que sitúa á vaca como referente do desenvolvemento rural. A mostra pretende contribuír con estas imaxes a que a cidadanía tome conciencia da riqueza económica e social que a vaca xera en Galicia.

Unha visión completa sobre o aproveitamento económico da especie, dende a tecnoloxía aplicada nas granxas, ata as vacas como obxecto de investigación nas universidades, que pasa pola a variedade de razas autóctonas, a industria láctea e a da carne, ou a gastronomía, e que se complementa cun tributo ao animal que é icona cultural galega. Así, aparecen na exposición de Lobato vacas de pasarela, pero tamén aquela vaca que Castelao cría merecente de estampar o papel moeda galego “como símbolo da nosa economía humanamente distribuída”.

A exposición, en módulos moi visuais, complétase coas reflexións que arredor da vaca fan recoñecidas firmas galegas, entre elas as de

Xosé Luís Méndez Ferrín, presidente Real Academia Galega;

Manuel Rivas, escritor;

Ramón Villares, presidente Consello da Cultura Galega;

Rosalía Mera, presidenta Fundación Paideia;

Enrique Sáez, presidente Fundación Juana de Vega;

Lourenzo Fernández Prieto, catedrático de Historia Contemporánea;

Miguel Anxo Seixas, gandeiro e vicepresidente da Fundación Castelao;

José Luis Gómez, columnista de El País;

Felipe Senén, académico;

Antón Losada, profesor Ciencia Política;

Amancio Liñares, escritor;

Xusto Sánchez Varela, gandeiro;

Higinio Mougán, de AGACA;

Xosé Turnes, director de Progando;

Xosé A. Fraga, divulgador científico;

José Armando Tellado, director xeral Larsa;

Xesus Ferro e Pedro Benavente, co-autores do libro Vaca;

José Ramón Justo Feijoo de Boaga;

Luis Antonio Vázquez de ternera galega;

Flavio Morganti, restaurador; e Fátima Otero, crítica de arte.

Tras o seu paso por Ourense, a exposición poderá verse en Vilagarcía de Arousa, Semana Verde de Galicia en Silleda, Vigo, A Coruña, Pontevedra e Lugo.

Ourense, 12 de abril de 2012.